Samichlaus-Gedicht

O Samichlaus Du guete Maa
ich weiss nöd, ob der’s säge cha,
es truckt mi nämlich tüüf im Härz,
so öppis wie’n en liise Schmerz.
Chumm buck Dich zuemer, bis so guet,
dänn säg der, was mich plage tuet.

Nüssli, Schoggi, viel feini Sache
tüend fescht chrank mich mache.
Ich hätt so gern kei Allergie,
d’Anna Füller Xi isch immer debii.
Sie droht üs alltag, wär gern üse Gascht –
weisch Samichlaus, drum briegg i fascht.

Ich wünschti mir, du würdsch si packe,
d Ruetä bruche, si gar isacke.
Dänn dörft ich wieder eifach ässe,
wie alli Chinde, d Häx vergesse.
S Notfallset nümm umeträge,
weisch das nervt, das chan der säge.

Guetzli, Schoggi, Haselnüssli,
chämtisch über vieli Küssli!
Studentefuäter mit Rosinli,
nöd nur immer Manderinli.
Dänn chönnt ich ässe Grittibänze,
und mini Auge würded glänze.

Das das nöd gaht, das weiss i scho,
jetzt bisch du aber grad mal do,
drum möchti dich nur eifach bitte:
Leg eifach mini Allergen ufd Site
und bring si dänn de andre Chind,
wo nöd dadruf allergisch sind.

Lies Zuetatelischtä gnau und recht,
suscht gahts mir schnell ganz schlecht.
Zu kompliziert häsch du dir dänkt?
Dänn wird das Chind halt nöd beschänkt?
Gib mir halt eifach Öpfel und Birä,
dänn chan i trotzdem au mitfirä.

———————————————–
An alle, die kein Schweizerdeutsch verstehen: Entschuldigt bitte, ich konnte es mir in diesem Beitrag ausnahmsweise einfach nicht verkneifen 😜🎅 Aber hier könnt ihr eine Übersetzung davon lesen.